Kəbə Nədir?

Kəbəyi-Müəzzəmə – Məscidül-Həramın mərkəzində yerləşən və müsəlmanların qibləsi olan müqəddəs bir məbəddir. O, yer üzündə ibadət üçün tikilmiş ilk Allah evi (Beytullah) hesab olunur. Qurani-Kərimdə Kəbənin müxtəlif adları çəkilmişdir:

• əl-Kəbə
• əl-Beyt
• Qiblə
• əl-Beytül-Haram
• əl-Beytül-Ətiq

Kəbənin İlahi Mövqeyi

Kəbə, yerdə Beyti-Məmurun (mələklərin göydə təvaf etdiyi müqəddəs məkan) tam altında yerləşir. Rəvayətlərə görə, əgər Beyti-Məmurdan düz bir xətt çəkilsə, bu xətt Kəbənin ortasından keçər. Bu isə Kəbənin ilahi mövqeyini və əhəmiyyətini göstərir. Bu müqəddəs məkan həm də Həccin əsas mərkəzi və ümumdünya müsəlmanlarının qibləsidir.

Kəbənin Quruluşu və Ölçüləri

Kəbə dördkünc, yer səviyyəsindən yüksək və vahid bina kimi tikildiyi üçün ona "Kəbə" adı verilmişdir. Kəbənin ölçüləri aşağıdakı kimidir:

• Hündürlük: 13 metr
• Mültəzəm tərəfindən uzunluğu: 12,84 metr
• Hətim tərəfindən uzunluğu: 11,28 metr
• Hətim ilə Rüknü Yəməni arasındakı məsafə: 12,11 metr
• Rüknü Yəməni ilə Həcərül-Əsvəd arasındakı məsafə: 11,52 metr
• Ümumi sahəsi: 145 m²

Kəbənin Dörd Küncü və Əsas Hissələri

Kəbənin hər küncünün xüsusi bir adı vardır:

• Şərq küncü: Rüknü Həcəri-Əsvəd
• Şimal küncü: Rüknü İraqı
• Qərb küncü: Rüknü Şami
• Cənub küncü: Rüknü Yəməni

Əsas Hissələr:

• Həcərül-Əsvəd: Təvafa başlama nöqtəsidir.
• Mültəzəm: Duanın qəbul olunduğu yer.
• Kəbə qapısı: Qızıl qapıdır və giriş üçün istifadə olunur.
• Hətim: Kəbəyə bitişik, yarım dairəvi divarla əhatələnmiş sahədir.
• Hicri İsmail: Hz. İsmail və anası Hacərin dəfn olunduğu yer.
• Məqamı İbrahim: Hz. İbrahimin Kəbəni tikərkən dayandığı daş.
• Qızıl nov: Yağış suyunu Kəbənin damından axıdan qızıl rəngli nov.